الحاج سترجنرال عبدالرشید دوستم روضۀ مبارک نینگ قیته قوریلیشی اوچون یوزمینگ دالر یاردم ایتدی
افغانستان ملی اسلامی جنبشی نینگ رهبری و افغانستان باش قوشونلر ارکان رئیسی الحاج ستر جنرال عبدالرشید دوستم تناو سه شنبه کونی افغانستان شمالی گه بولگن سفریده مزارشریف ده گی حضرت علی (ک و) روضه سی نی زیارت ایتکن. دوستم جنابلری مزارشریف ده گی بیر قطار فرهنگی شخصیت لر بیلن بیرگه روضۀ مبارک نینگ برچه بولیم لرینی ایله نیب، ساختمانی وضعیتی نی بیرمه بیر کوزدن کیچیرگن.

جنرال عبدالرشید دوستم اسلام دینی نینگ تورتینچی خلیفه سی حضرت علی روضه سی نینگ قیته قوریش ایشلری اوچون یوز مینگ دالر (100000$) مبلغ نی هدیه قیلگن. روضۀ مبارک نینگ قیته قوریش ایشلری اوچون بیر کمیسیون تشکیل بیریلیب، کمچیلیکلرینی تیزلیکده توگه تیلیشی گه بویروغ بیرگن. شونینگدیک روضۀ مبارک درگاهیده گی ایشان خادملرگه هم بیش مینگ دالر یاردم ایتکن.

حضرت علی کرم الله وجهه نینگ مزارشریف ده گی روضه سی 1375.ینچی ییلرده الحاج ستر جنرال عبدالرشید دوستم نینگ مادی و معنوی یاردمی بیلن اساسی بیر شکلده قیته قوریلگن ایدی. مذکور قیته قوریش ایشی بیر یریم ییل دن کوپراق دوام ایتکن. کونده اورتلمه 150 کیشی نقاشلر، خطاطلر، میناتوریستلر، حکاکلر، سنگتراشلر، نجارلر، معمارلر و باشقچه صنعتچیلر ایش یوریتکن لر. مذکور قیته قوریلیشده روضه عمارتی نینگ برچه بولیملری مکمل بیر شکلده قیته قوریلدی. اونینگ یانیده بعضی بیر ینگی قوریلیش لر هم بولگن ایدی. جمله دن روضه باغچه سیده دم آلیش اوچون قوریلگن فواره لر، اولتیریش محللری و شونینگدیک روضه مبارک نینگ ایچکری ایشیگی اوستیده اون بیش کیلوگرام آلتین یا طلا دن تیارلنگن کلیمۀ طیبه تیارلب آسیلدی. حاضرده هم مذکور آلتین لوحه قوریلگن ییریده سقلنه دی. اوشه زمان کی قیته قوریش جریانی طالبلرنینگ مملکت شمالی گه بولگن هجومی بیلن تاختب قالدی. نتیجه ده روضۀ مبارک نینگ صحنیده گی کاشی کارلیک و شونگه اوخشش بعضی کیچیک ایشلری توگه می قالگن ایکن. واقعه دن قریب 15 ییل اوتیب حاضرده هم مذکور کمچیلیک لر بولگنیچه قالگن ایکن. افغانستان باش قوشون لر ارکان رئیسی و ملی اسلامی جنبشی رهبری الحاج ستر جنرال عبدالرشید دوستم بو سفریده عینآ اوشه قالگن ایشلرنی کوزیدن اوتکزیب، مذکور قیته قوریش پروژه سینی تکمیل بولیشی اوچون قیته دن ایش باشله تیلیشی نی ایسته گن. در حقیقت جنرال دوستم بوندن 15 ییل آلدین باشله گن قیته قوریش پروژه سینی کامل لشتیریش نیتیده یوزمینگ دالرنی اجرتکن. 

حضرت علی زیارتی اون ایککینچی عصر سلجوقیلر دوریده مملکت شمالیده گی بلخ منطقه سیده تاپیلیب، ایریم معمالر باعث یشرین بیر شکلده سقلنگن ایدی. اون بیشینچی عصر تیموریلری سلاله لریدن بولگن سلطان حسین بایقرا و اونینگ مدبر وزیری امیرالکلام علیشیر نوائی حضرتلری تمانیدن مکمل بیر بنا شکلیده قوریلدی. اوشبو عمارت نینگ قوریلیشی اوچون بلخ ولایتیده علاحیده بیر نهر قازیلیب، اوندن کیین مذکور نهر نینگ آتی نهر شاهی دیب اتلگن. حاضرده هم عینآ شو آتگه توتیله دی. حضرت علی مقبره سی قوریلیش پئیتیده اونینگ اطرافیده حماملر، دکانلر و مقبره مجربان لری اوچون اویلر هم قوریلگن. کیینچه لیک خلق نینگ توجه سی مذکور منطقه گه قره تیلیب، سیکین سیکین مزارشریف اسملی بویوک بیر شهر گه ایلنگن.
اوزبیگ ویبلاگچیلر